Ukristo Korokoroni-Tanzania Usiyoijua!

Wapendwa hivi karibuni nilipata fursa ya kwenda kufanya kazi sehemu za Pemba katika shughuli zangu za ajira. Nilipokuwa nikielekea huko nilipata mashaka kama huko ninaweza nikapata kanisa la wasabato la kuabudia hivyo nilifanya mawasiliano na baadhi ya watu walio Unguja na wakaniambia kanisa lipo na kupewa mawasiliano.

Nilipofika Pemba nilifanikiwa kufika katika eneo wafanyalo ibada waadventista wasabato katika eneo la Chakechake maeneo yaitwayo vitongoji. Eneo hilo ni eneo la kambi ya jeshi ambapo ndipo jamii za kikristo zimepata fursa za kujenga maeneo yao ya ibada, na kwa upande wa wasabato wao wanatumia jengo la shule ya msingi ya zamani ya jeshi kufanyia ibada zao. Eneo hili ndilo eneo pekee ambalo waadventista wasabato wanakusanyika rasmi kufanya ibada kama kanisa. Nilipofika hapo nilikuta jamii iliyochangamka yenye kumtukuza Mungu huku watu wengi wakiwa wamewahi kuanzia darasa la walimu la saa 2. Kuwahi kwao ni kana kwamba kila mtu alitambua kwamba yeye ni muhimu na kuchelewa kwake kuna nafasi ya kuathiri mwenendo mziwa wa kanisa, kwani kanisa lina idadi ya jumla ya watu kati ya 20 ikijumuisha wakubwa na wadogo. Nilifurahishwa na vipindi vyao vilivyozingatia muda vyema.

Nikiwa ninasali katika kanisa hili ndipo nilipopata taarifa kutoka kwa mmoja wa wainjilisti wetu (ambaye ndiye aliyenielekeza kanisa kwa njia ya simu) kuwa eneo analoishi yeye halina uhuru wa kuabudu kama huo niliokuta hapo au ambao nimeuzoea mahali pengine popote. Jambo hili liliibua udadisi wangu na akanikaribisha kwenda kuabudu nao katika maeneo yao, mkoa wa kusini, wilaya ya Mkoani. Nilipanga na nilikwenda huko. Nilipofika huko nilistaajabia kukuta hali ambayo nilikuwa nafikiri inafanyika pengine nchi za uarabuni na kikomunisti ikiwa ipo Tanzania hii. Waumini wetu huko wanaabudu kwa kificho kikubwa.

Katika mazingira hayo jamii ya wenyeji nao kwa uaminifu katika imani yao wanafanya kila jitihada kuhakikisha ukristo haupenyi wala kupata nafasi katika jamii yao. Hivyo mtu yeyote anayebainika kuwa anajishughulisha na mambo ya dini ya kikristo huwa katika hatari ya kutopata nyumba ya kupanga, kutoungwa mkono katika shughuli zake za kiuchumi endapo kama zitawategea wao kwa kiasi fulani, mfano biashara. Kwa kuwa jamii kubwa ya waumini wetu walioko huko ni watu walioenda kujishughulisha na shughuli za kilimo basi hiyo huhatarisha upataji wao wa vibarua, makazi n.k. Kwa upande mwingine kwa wale walio tayari kukana imani wao huweza kupata vibarua vingi, makazi ya bure, na hata binti wa kuoa endapo watakuwa tayari. Hizi ni baadhi ya picha zikionyesha hali katika maeneo hayo ya ndugu zetu.

Ibada ya sabato ndani ya chumba kilichofungwa. Ibada hizi hufanyika bila hata ya uimbaji kuondoa hali ya kubainika. Ibada hizi huwa za muda mfupi tu kama nusu saa hivi. Wanaoonekana ni watu wote katika ibada hiyo (ongeza na mpiga picha)

Mwinjilisti (mwenye kofia gotini) akiwa na baadhi ya waumini na wanafunzi wa biblia muda wa alasiri siku ya sabato alipowatembelea kwa ajili ya kufanya nao ibada na kujifunza nao biblia. Hiyo nyumba ni nyumba ambayo haitumiki hivyo ilifaa kwa kujibanzia. Shauku ya neno ni kubwa sana katika maeneo haya.

Waumini pia hugawana maeneo na mwinjilisti kwa ajili ya kuwatembelea waumini ili kuwatia moyo na kujifunza nao. Waumini hao nao hualika marafaiki zao ili waweze kujifunza nao habari njema. Maeneo haya hayana wainjilisti wa vitabu, maduka ya ABCs- Adventist Book Centes. Vijuzuu pia havipatikani kirahisi

Picha ya pamoja mwinjilisti na waumini na wanafunzi wa biblia. Biblia hizi mwinjilisti hutembea nazo maana waumini hawa ni wapya na hawana biblia, hali kadhalika wanafunzi mara kadhaa humpasa kuwaachia biblia hizo ili wajifunze nazo.

Picha ya pamoja na waumini na wanafunzi wengine baada ya kufanya ibada ya jioni ya sabato ndani ya jiko lao.

Katika makambi yaliyopita mwezu huu wa 7 roho mpya 5 zilibatizwa kutoka maeneo haya. Binafsi niliguswa na mazingira haya na kuamua kufanya kitu kwa ajili ya ndugu zetu hawa katika Bwana. Unapokuwa unasali kumbuka watu hawa waishio katika mazingira magumu ya ibada na endapo ukiwiwa kufanya jambo kwa ajili yao unaweza kuwasiliana moja kwa moja na mwinjilisti wao kwa nambari 0718-109936. Pamoja na hayo kama kuna namna ambayo unaweza ukafikiria kuwa endapo ikibuniwa au ikitumiwa katika mazingira hayo inaweza kufaa kuwasaidia watu hawa wa Mungu katika kumwabudu Mungu wao usisite kutoa maoni yako. Kumbuka watu hawa wengi wao hawana miongozo ya kujifunza biblia-lesoni, hawana masomo ya nchi za mbali na hata mahala rasmi pa kuabudia, hivyo kufanya ibada zao kutokuwa kama zenye mfumo tuliuzoea bali zenye kuendana na mazingira, ambapo mara nyingine zisifanyike kabisa. Hivyo maoni yako yanaweza yakafanya jambo jema katika jamii hii ya kanisa la Mungu ulimwenguni.